ایپل مان گیا کہ فونز کو جان بوجھ کر سست کیا جاتا ہے

0 46

ایپل نے تسلیم کیا ہے کہ وہ پرانے آئی فونز کو جان بوجھ کر سست کرتا رہا ہے۔

بہت سے صارفین کو پہلے ہی سے شک تھا کہ ایپل خود ہی ان فونز کو سست کرتا ہے تاکہ لوگ پرانے فون ترک کر کے نئے فون خریدیں۔

اب کمپنی نے وضاحت کی ہے کہ اس کا مقصد یہ تھا کہ پرانے فونز کی بیٹریاں وقت گزرنے کے ساتھ کمزور پڑ جاتی ہیں اور وہ فون کو سست کر کے بیٹریوں کی زندگیوں کو طوالت دینا چاہتے ہیں۔

یہ بات اس وقت منظرِ عام پر آئی جب سوشل میڈیا ویب سائٹ ‘ریڈ اِٹ’ پر ایک صارف نے اپنے آئی فون 6 ایس کی کارکردگی کے نتائج پوسٹ کیے جن سے ظاہر ہوتا تھا کہ ان کا فون بہت سست پڑ گیا تھا، لیکن جب اس کی بیٹری تبدیل کی گئی تو وہ پھر سے تیز ہو گیا۔


یہ بھی پڑہیں

گلیکسی ایس 9 پہلا سب سے تیز چارج ہونے والا اسمارٹ فون ہوگا: سام سنگ


ٹیکنالوجی ویب سائٹ ‘گِیک بینچ’ نے کئی آئی فونز کا تجزیہ کیا جن سے واضح ہوا کہ واقعی بعض فونز جان بوجھ کر سست کیے جا رہے ہیں۔

بار بار چارج اور ری چارج ہونے کے عمل سے گزرنے کے بعد لیتھیئم بیٹریوں کی کارکردگی مسلسل متاثر ہوتی رہتی ہے کیوں کہ اس دوران لیتھیئم کے کچھ ’آئن‘ اپنی جگہ چھوڑ دیتے ہیں۔

یہ ایسا ہی ہے جیسے لوہے کو رفتہ رفتہ زنگ لگتا رہتا ہے۔

بلاگر نِک ہیر نے لکھا ہے کہ ‘ایپل نے یہ کام اتنی خاموشی سے کیا جس سے لگتا ہے ان کے مقاصد مشکوک تھے۔ ایپل ایک عرصے سے اپنے صارفین کی توقعات پر پورا اترتا رہا ہے لیکن اس موقعے پر انھوں نے بیڑہ غرق کر دیا، اور وہ بھی بلاوجہ۔’

ٹیکنالوجی کمپنی ‘برائٹ بی’ کے کرس گرین نے لکھا: ‘انھیں چاہیے تھا کہ وہ زیادہ شفافیت دکھاتے۔

‘لوگوں نے پیسے خرچ کیے ہیں اور آپ ان کے فونز کو سست بنا رہے ہیں۔ آپ کو اس کی وضاحت کرنی چاہیے تھی۔’

loading...
بشکریہ بی بی سی اردو
یہ بھی ضرور پڑھیں